பற்றியெறியும் முட்செடியின் வெப்பத்தில்
முட்செடிக்கு எதுவும் நிகழவில்லை
நிகழ்ந்தது அனைத்தும் மோயீசனுக்குத்தான்
பாரவோனிடம் சண்டையிட
ஒரு சிறிய கைத்தடியோடு கிளம்பிப்போனான்
கோலியாத்தைச் சாய்த்துவிட
தாவீது ஒரு கூழாங்கல்லோடு போனது போல
அந்த வெப்பம் தட்டியெழுப்புவதில்லை
மென்காற்றில் கூட அதன் வெப்பத்தை
கண்டவர் எலியா
ஆமணக்குச் செடியில் யோனா
ஆற்றுநீரில் நாமான்
ஆடையின் விளிம்பில்
ஒரு நோயுற்ற பெண்
அந்த வெப்பம் எங்கும் இருக்கிறது
ஆனால் அது யாரையும் சுடுவதில்லை
யாரையும் கருக விடுவதில்லை
யாரையும் எதுவும் கேட்பதில்லை
அது எரிந்துகொண்டேயிருக்கிறது
நமது தோல் அந்த வெப்பத்திற்கு
மிகவும் பழகிவிட்டதாலோ என்னவோ
அந்த வெப்பத்தைக் குறித்த
உணர்ச்சிகள் மழுங்கிவிட்டன
அதன் வெப்பம் விறகுகளையோ
சாம்பலையோ உருவாக்குவதில்லை
ஆயினும் விறகு தள்ள
பெரிய மனிதர்கள் முன்வருகிறார்கள்
நெருப்பின் சூட்டில்
ஒருவன் செல்பி எடுக்கிறார்
ஒருவன் தன் சிகரெட்டைப் பற்றவைக்கிறான்
ஒருவன் போர்வையை எடுத்து மூடிக்கொண்டு
அசந்து தூங்கிப்போகிறான்
நெருப்பு
எரிந்துகொண்டேயிருக்கிறது
ஒருவன் எங்கோ பறந்து கொண்டிருக்கும்
மின்னட்டாம் பூச்சிகளைக் கனவு கண்டுகொண்டிருக்கிறான்
