பழக்கவழக்கங்களும், மனமாற்றமும் (Habits and Conversion)

முன்னுரை

'ஐந்தில் வளையாதது ஐம்பதில் வளையாது', 'தொட்டில் பழக்கம் சுடுகாடு மட்டும்' என்பன நாம் நன்கறிந்த பழமொழிகள். சிறுவயது பழக்கவழக்கங்கள் நம் வாழ்வின் கடைசி நிமிடம் வரை நம்மோடு தொடர்கின்றன; அவற்றை மாற்றுவது கடினம் என்பதே இவற்றின் பொருள் ஆகும். சாதாரணமாக மனித அனுபவங்களிலிருந்து கண்டறியப்பட்ட இவ்வுண்மையினை இன்றைய உளவியல் ஆய்வுகள் உறுதி செய்கின்றன. ஆகவே இக்கட்டுரையானது அன்றாட பழக்கவழக்கங்களில் ஏற்படும் சிறிய மாற்றங்கள் மனமாற்றத்திற்கு எவ்வாறு அடிப்படையாகின்றன என்று கூற முற்படுகின்றது.

பழக்கவழக்கங்கள்

HABIT என்கின்ற ஆங்கில வார்த்தையில் H என்ற எழுத்தை நீக்கிவிட்டால் A BIT இன்னும் மிச்சமிருக்கின்றது. A-ஐ நீக்கிவிட்டால் இன்னும் ஒரு BIT இருக்கின்றது. B -ஐ நீக்கிவிட்டால் இன்னும் IT இருக்கின்றது. ஆகவே பழக்கவழக்கங்கள் எப்போதும் நம்மோடு இருக்கின்றன. அவை நல்லவையா, கெட்டவையா என்பதைப் பொறுத்தே நம் வாழ்வின் வெற்றியும், தோல்வியும் அமைகின்றன. பழக்கவழக்கங்கள் நம்மோடு பிறப்பவை அல்ல. அவற்றை நாம் தான் உருவாக்குகின்றோம். நாம் வாழும் சூழலும், அதற்கான நமது எதிர்வினைகளுமே நமது பழக்கவழக்கங்கள் உருவாக அடிப்படையாகின்றன. நாமே உருவாக்கிய ஒன்றை நாம் நினைத்தால் மாற்றவும் முடியும் தானே?

மனம்

மனம் என்பது என்ன? மனம் என்பதை ஒரு சொல்லில் விளக்க முடியாது. நம் எண்ணங்கள், கற்பனைகள், சிந்தனைகள் போன்றவற்றின் ஒரு தொகுப்பு என்று புரிந்து கொள்ளலாம். நான் யார்? என்ற கேள்விக்கு விடை எனது பெயரோ, எனது தோற்றமோ, எனது பின்புலமோ மட்டுமல்ல. நான் என்பது முதன்மையாக எனது உள்ளார்ந்த மனமே ஆகும், அதனால் தான் திருவள்ளுவர்

மனத்துக்கண் மாசிலன் ஆதல் அனைத்தறன்

ஆகுல நீர பிற

என்கிறார். மனத்தூய்மையே அறம். மற்றவை ஆரவாரத்தைத் தவிர வேறொன்றுமில்லை என்று விளக்கம் தருகிறார் கலைஞர்.

மனமும், பழக்கவழக்கங்களும்

இந்த மனதிற்கும், நமது பழக்கவழக்கங்களுக்கும் நெருங்கிய தொடர்பு இருக்கிறது. நல்லவர் தம் உள்ளமாகிய நல்ல கருவூலத்திலிருந்து நல்லவற்றை எடுத்துக் கொடுப்பர். தீயவரோ தீயதினின்று தீயவற்றை எடுத்துக் கொடுப்பர். உள்ளத்தின் நிறைவையே வாய் பேசும் (லூக்கா 6:45) என்ற நம் ஆண்டவரின் வார்த்தைகள் தான் எத்துணை உண்மை. நம் மனம் நல்ல கருவூலமாக இருக்கும் போது நமது பழக்கவழக்கங்களும் நல்லவையாக மாறும். ஆகவே நாம் நம் மனதை மாற்றாத வரையில், நமது பழக்கவழக்கங்களையும் மாற்றுவது கடினமே. அப்படியே மாற்றினாலும் அது தற்காலிகமானதாகவே இருக்கும். கெட்ட கனி தரும் நல்ல மரமுமில்லை. நல்ல கனி தரும் கெட்ட மரமுமில்லை. ஒவ்வொரு மரமும் அதனதன் கனியாலே அறியப்படும். (லூக்கா 6:43).

பழக்கவழக்கங்களின் முக்கியத்துவம்

ஒரு பருப்பொருள் என்பது பல சின்னஞ்சிறிய அணுக்களின் தொகுப்பே ஆகும். அது போல பல சின்னஞ்சிறிய பழக்கவழக்கங்களின் தொகுப்பே நம் வாழ்வு ஆகும் என்று ATOMIC HABITS என்னும் புத்தகத்தில் ஜேம்ஸ் கிளியர் குறிப்பிடுகிறார். இக்கட்டுரையில் காணும் பெரும்பாலானக் கருத்துக்கள் அப்புத்தகத்திலிருந்து எடுக்கப்பட்டதுதான். காலையில் எழுந்ததும் நம் படுக்கையை ஒழுங்கு செய்வது, வண்டி சாவி, குடை போன்ற பொருட்களை அதனதன் இடத்தில் வைப்பது, சரியான நேரத்தில் தூங்கச்செல்வது போன்ற சிறிய செயல்பாடுகள் நம் வாழ்விற்கு பெரிய மாற்றங்களைக் கொண்டுவர முடியும் என்பது தான் அப்புத்தகத்தின் மையக்கருவாகும். நம்ப முடிகிறதா? ஆம்! நாம் யார் என்பது நமது படிப்போ, பட்டமோ, பதவியோ அல்ல! நாம் என்னவாக இருக்க விரும்புகிறோம்? எத்தகைய வெற்றிகளை அடைய விரும்புகிறோம் என்பது அல்ல? மாறாக நாம் யார் என்பது இன்று நாம் என்ன செய்கின்றோம் என்பதே ஆகும்.

பழக்கவழக்கங்களை மாற்றுவது எப்படி?

ஒரு வெற்றுக் கோப்பையிலும் காற்று இருக்கிறது. காற்று இல்லாமல் ஆக்க வேண்டுமென்றால் எளிய வழி அதில் வேறு எதையாவது (எ.கா: நீர், மாவு) நிரப்ப வேண்டும். அது போலத்தான் நம் பழக்கவழக்ககங்களை மாற்ற வேண்டுமென்றால் புதிய பழக்கவழக்கங்களை உருவாக்க வேண்டும். நல்ல பழக்கவழக்கங்கள் நம்மில் உருவாக மூன்று தூண்டுகோல்கள் உள்ளன. அவை,

1.   இலக்கு  நோக்கிய பழக்கவழக்கம்: நான் தேர்வில் நல்ல மதிப்பெண் பெற வேண்டும் என்பது என் இலக்காக இருக்கும் போது, நான் கட்டாயம் தினந்தோறும் இரண்டு மணி நேரம் கூடுதலாகப் படிக்க பழகிக்கொள்ள வேண்டும். இதனால் நான் தொலைக்காட்சி, அலைப்பேசியில் செலவழிக்கும் என் பழையப் பழக்கவழக்கத்தை மாற்றிக்கொள்வேன். ஆயினும் நான்  என் இலக்கையே நினைத்துக் கொண்டிருப்பதால் இன்று நான் செய்யும் செயல்களை சுமையாகக் கருதவும், விரும்பும் மதிப்பெண்களைப் பெற்ற பிறகு படிக்கும் பழக்கத்தைக் கைவிடவும் வாய்ப்பிருக்கிறது.

2. அமைப்பு நோக்கிய பழக்கவழக்கம்: நான் தேர்வில் வாங்கும் மதிப்பெண்களைப் பற்றி அதிகம் அக்கறைப்படப் போவதில்லை. ஆனால் தினந்தோறும் படிப்பதை நான் விரும்புகிறேன். அது இலக்கு பற்றிய பதற்றத்தைக் குறைப்பதோடு, அதை நோக்கியப் பயணத்தை ரசிக்கவும்  செய்கிறது. கிரிக்கெட் அணியின் கேப்டன் தோனி அடிக்கடி கூறுவது இதுதான், நாங்கள் முடிவுகளைப் பற்றிக் கவலைப்படவில்லை. நன்றாக, முழு ஈடுபாட்டோடு, குழுஉணர்வோடு விளையாடினோமா என்பதுதான் முக்கியம். ஆகவே என் ஒரு நாளை நான் விரும்பும் படியான செயல்களைக் கொண்டு கட்டமைக்க விரும்புகிறேன். அது என்றாவது ஒருநாள் என்னையும் அறியாமல் வெற்றிகளைக் காணச்செய்யும்.

3. சுய அடையாளம் நோக்கிய பழக்கவழக்கம்: நான் என்னை நன்கு படிக்கும் ஒரு மாணவன் என்று அடையாளப்படுத்திக் கொள்ள விரும்பினால், நான் தினந்தோறும் படிக்கும் பழக்கத்தை ஏற்படுத்திக்கொள்வேன். நான் ஒரு சிறந்த பந்துவீச்சாளர் என்று என்னை அடையாளப்படுத்தினால், நேரம் கிடைக்கும் போதெல்லாம் கையைச் சுழற்றி கற்பனையில் கூட பயிற்சி எடுத்துக் கொண்டிருப்பேன். நண்பர்கள் வற்புறுத்துவதால் சிலர் மதுப்பழக்கத்திற்குள் விழுந்துவிடுகிறார்கள். பிறகு வருந்துகிறார்கள். பின்னர் ஒருநாள் மீண்டும் நண்பர்கள் வற்புறுத்தும் போது, நான் குடியை விட்டுவிட விரும்புகிறேன் என்று சொன்னால் நிச்சயம் இந்த ஒரு முறை மட்டும் என்று மீண்டும் வற்புறுத்துவர். ஆனால் நான் இப்போது குடிகாரன் இல்லை என்று தான் விரும்பும் சுயஅடையாளத்தை முன்னிலைப்படுத்தும் போது அதற்கான மதிப்பும், பலனும் அதிகம். நீங்கள் எதை அடைய விரும்புகிறீர்கள் என்பதை விட, நீங்கள் யாராக இருக்க விரும்புகிறீர்கள் என்பதே உங்கள் பழக்கவழக்கங்களைத் தீர்மானிக்கின்றன.

நிறைவாக:

பழக்கவழக்கங்களின் மாற்றமே மனமாற்றம் என்று வார்த்தையில் சொல்லாவிடினும் வாழ்க்கையில் சொல்லியவர் நம் ஆண்டவர் இயேசு.

1.   அனைவருக்கும் நிறைவாழ்வு என்னும் இலக்கினைக் கொண்டிருந்தார். அது வேறு எங்கோ வானத்தில் இல்லை. உங்களுக்கு அருகில் உள்ளது என்றார்.

2.   பணிவிடை செய்யவே தான் வந்திருப்பதாகக் கூறியதோடு தெருக்கள் தோறும் சென்று கற்பித்தார். சீடர்களைத் தன்னோடு சேர்த்துக்கொண்டு குழுவாக செயல்பட்டார். பசித்திருப்போருக்கு உணவளித்தார். நோயுற்றோரைக் குணமாக்கினார். ஒதுக்கப்பட்டோருக்கு சுயமரியாதையை அளித்தார். அன்றாட நாளை இவ்வாறு நற்பணிகளால் கட்டமைத்தார். அதில் பெருமகிழ்ச்சி கண்டு கடவுளைப் புகழ்ந்தார்.

3.   தான் கடவுளின் மகன் என்ற தன் அடையாளத்தை மையமாகக் கொண்டு தன் அன்றாடப் பழக்கவழக்கங்களை அமைத்துக்கொண்டார். தான் இறைமகன் என்ற அடையாளத்திற்கு எதிராக எதையும் அவர் செய்யவில்லை. நாமும் இறைமக்கள் என்ற அடையாளத்தை முதன்மையாகக் கொள்ளவேண்டும் என்பதற்காக, கடவுளைத் தந்தையே என்று அழைக்கக் கற்றுத்தந்தார்.

உங்கள் ஒளி மனிதர்கள் முன் ஒளிர்க! என்ற நம் தலைவரின் விருப்பத்தை நிறைவேற்ற நல்லப் பழக்கவழக்கங்களை நமதாக்கி வாழ்வில் நிறைவைக் காண்போம்.

வினைமுடித்தன்ன…

மகிழ்ச்சியில் பெரும் மகிழ்ச்சி தொடங்கிய ஒரு காரியத்தை செய்து முடித்தலால் வரும் மகிழ்ச்சி ஆகும். கடந்த அக்டோபர் முதல் நாள் புனித குழந்தை தெரசாள் திருநாள் அன்று தொடங்கிய என்னுடைய '98 நாளில் விவிலிய வாசிப்பு'  (இத்தாலிய மொழியில்) திட்டமிட்டபடியே ஜனவரி 6 அன்று நிறைவுற்றது.

ஒருவர் ஒரு காரியத்தை செய்வதற்கு தீர்க்கமாக விரும்பும்போது ஒட்டுமொத்த பிரபஞ்சமும் அவருக்கு உதவி செய்யும் என்று பவுலோ கொயலோ அவருடைய அல்கெமிஸ்ட் நாவலில் குறிப்பிடுகிறார். இதனை பல வேளைகளில் உணர்ந்திருந்தாலும், இந்த முறை மிகவும் துல்லியமாக பிரபஞ்சத்தின் உதவியை உணர முடிந்தது.

நாகர்கோவிலில் இருக்கும் என்னுடைய உறவினர் ஒருவர் 100 நாளில் விவிலிய வாசிப்பிற்கான அட்டவணையை முதன்முதலாக செப்டம்பரில் கொடுத்தார். அவர் அந்த அட்டவணைப்படியே வாசித்து முடித்ததாகவும் சொன்னார். பல்வேறு அலைச்சல்கள் நிறைந்த ஒரு காலக்கட்டம் என்பதால் என்னால் முடியும்  என்று நினைக்கவில்லை. தற்செயலாக அதனை செயல்படுத்த அக்டோபர் 1, 2022 அன்று தொடங்கியதோடு முகநூலிலும் பதிவிட்டேன்.

தனிப்பட்ட நற்செயல்களை பொதுவெளியில் பதிவிடுவதற்கு பெரிய தயக்கம் இருந்து. ஆயினும் என்னை நானே ஒரு கட்டாயத்திற்கு உட்படுத்துவதற்கு அது உதவும் என்று கருதினேன். ஆகவே தான் சில நாட்களில் வாசிப்பதற்கு ஆர்வம் குன்றிய போதிலும், இயலாத மனநிலையிலும், சூழ்நிலையிலும், சொன்ன வார்த்தையை செயல்படுத்த வேண்டும் என்ற அழுத்தத்தினால் என்னையே வற்புறுத்தி வாசித்தேன். 73 புத்தகங்களை உள்ளடக்கிய கத்தோலிக்க திருவிவிலியத்தை பழைய ஏற்பாட்டின் தொடக்க நூலிலிருந்து ஒரு பகுதியாகவும், மையத்தில் இருக்கும் திருப்பாடல்களில் இருந்து ஒரு பகுதியாகவும், புதிய ஏற்பாட்டின் மத்தேயு நற்செய்திலிருந்து ஒரு பகுதியாகவும் அன்றாடம் 3 பகுதிகள் அட்டவணைப்படி வாசிக்க வேண்டும். ஆயினும் சில நாள்களில் ஏதாவது ஒரு பகுதியை மட்டும் வாசிப்பது, அல்லது ஒரு பகுதியை இரண்டு மூன்று நாட்களுக்கு வாசித்துவிட்டு, பொறுமையாக கடன்பட்ட பகுதியை வாசிப்பது என்று சென்று கொண்டிருந்தேன். போக்கிரி படத்தில் குடுமி வைத்த வடிவேலு அவர்கள் பச்சக் பச்சக் என்று அடிவாங்குவது போல ஒரு கட்டத்தில் வாசிப்பில் குழப்பமும், சுமையும் அதிகரித்தது.

முழுக்க முழுக்க கிண்டில் உதவியோடு தான் பாதி விவிலியம் வாசித்தேன். ஒரு நாள் வாசிக்க தவறினாலும் அடுத்த நாள் சுமை இரண்டு மடங்கானது. ஒரு கட்டத்தில் தன்னம்பிக்கை இழந்து கைவிடும் நிலையில் இருந்த போது எழுத்தாளர் சரவண கார்த்திக்கேயன் அவர்களின் ஒருகோடி காலடிகளைப் பின்பற்றி நவம்பர் 20 முதல் அன்றாடம் பத்தாயிரம் காலடிகள் நடைபயிற்சியை தொடங்கினேன். நடைபயிற்சி சமயத்தில் பழைய ஏற்பாட்டு நூல்களை ஆடியோ புத்தகமாக கேட்கத் தொடங்கினேன். இது என் வாசிப்பு சுமைகளை வெகுவாக குறைத்தது. புதிய ஏற்பாட்டு நூல்களை மட்டும் கட்டாயம் கிண்டிலில் படிக்க வேண்டும் என்று முடிவு செய்தேன். ஆடியோ வாசிப்பு எளிதாக இருந்தாலும் பார்த்து வாசிப்பதில் இருக்கும் சுகமும், சிந்தனைக்கான தளமும் குறைவாகவே இருப்பது ஒரு குறைபாடு தான். ஒரு சில நாட்களில் பைபிளை அச்சு பதிப்பிலும் வாசித்தேன். அனைத்திலும் கிண்டில் வாசிப்பே சிறந்ததாக கருதுகிறேன்.

தொடர் செயல்பாடுகளில் முன்னுதாரணமாக இருக்கும் நண்பர்கள் அனைவருக்கும் நன்றி! பெரிய பெரிய காரியங்களை அமைதியாகச் செய்து சிறு புன்னகையோடு கடந்து செல்பவர்கள் இருக்கும் போது, 98 நாட்களில் பைபிள் வாசிப்பது ஒன்றுமே இல்லைதான். ஆயினும் இத்தாலிய மொழியில் வாசிப்பதில் இருக்கும் மனத்தடை நீங்கியது மட்டுமின்றி, ஒரு காரியத்தை திட்டமிட்டு செயல்படுத்த நினைத்தால், எந்த சூழ்நிலையும் அதைத் தடுக்க இயலாது என்ற ஒரு பாடத்தைப் புத்திக்குள் புகுத்தியமையால் என்னளவில் இது ஒரு நல்ல தொடக்கமாகவே கருதுகிறேன்.

தொட்டில் பழக்கம் (Impacts of habits in our life)

அதிகாலையில் எழும்புதல், பல் துலக்குதல், நகங்களை வெட்டுதல், காலந்தவறாமை போன்றவற்றை நல்ல பழக்கங்கள் என்றும், சோம்பேறித்தனம், கடமை தவறுதல், கை கழுவாமல் உண்ணுதல் போன்றவற்றை கெட்டப் பழக்கங்கள் என்றும் சிறுவயது பாடப்புத்தகத்தில் முதன் முதலாகப் படித்ததாக நினைவிருக்கிறது. அதன் பிறகு பழக்கவழக்கம் என்ற வார்த்தையை அதிகம் கேட்டதில்லை.

2013 ஆம் ஆண்டு புனேயில் ஒரு வகுப்பிற்காக சென்றிருந்த போது அருட்பணி. விக்டர் பழக்கவழக்கங்கள் என்ற தலைப்பில் பேசும் போது இவ்வாறு கூறினார் : It is very difficult to change a HABIT; because if you remove the H, A BIT is there; if you remove the HA, BIT is there; if you remove the HAB, still IT is there!

பழக்கவழக்கங்களை மாற்றுவது கடினம். எவ்வளவு முயன்றாலும் சிறிதளவேனும் நமது பழக்கவழக்கங்கள் நம்மைப் பின்தொடரும் என்பது தான் இதன் பொருள். தொட்டில் பழக்கம் சுடுகாடு மட்டும் என்பது எவ்வளவு உண்மை என்பதை நாம் அனைவருமே அறிந்திருப்போம்.

நமது சூழ்நிலைகளுக்கேற்ப ஒருமுறை நம் பழக்கவழக்கங்களை நாம் தீர்மானிக்கிறோம். பிறகு பழக்கவழக்கங்களே நமது வாழ்வைத் தீர்மானிக்கின்றன. ஆயினும் நாம் பிறக்கும் போதே நம் பழக்கவழக்கங்களோடு பிறக்கவில்லை. காலப்போக்கில் கற்றுக்கொண்டவையாக இருப்பதால் நம்மால் அவற்றைக் காலப்போக்கில் கைவிடுவதும், புதிதாகக் கற்றுக்கொள்வதும் இயலும் என்பதே கற்றறிந்தோர் கருத்தாகும்.

இப்போது பழக்கவழக்கங்கள் என்ற வார்த்தையை அடிக்கடி கேட்கிறோம். வெற்றி, தோல்வி போன்ற புறவயமானக் கணக்கீடுகளை மட்டுமல்லாது, ஒரு மனிதனின் அடிப்படை உரிமைகளான மகிழ்ச்சி, அமைதி, நிறைவு உணர்வு போன்ற அகவயமான மனநிலையிலும் பழக்கவழக்கங்கள் பெரிய தாக்கத்தை ஏற்படுத்துகின்றன என்பது கண்கூடு.

அண்ணன் ராஜராஜன் Rajarajan RJஅவர்கள் அடிக்கடி இதைப்பற்றி முகநூலில் எழுதுகிறார். Duolingo போன்ற மொழி கற்றல் செயலிகள் ஒரு தொடர் செயல்பாட்டை நமக்குள் பழக்கப்படுத்த உதவுகின்றன என்று ஒரு முறை எழுதியிருந்தார். அங்குதான் முதன் முதலாக Duolingo பற்றி கேள்விப்பட்டேன். இன்றோடு 306 நாட்கள் ஸ்பேனிய மொழியைத் தொடர்ந்து கற்றுக்கொண்டிருக்கிறேன் என்பதை என்னாலேயே நம்ப முடியவில்லை. இங்கு இலக்கு ஒரு மொழியைக் கற்றல் என்பதைக் காட்டிலும், ஒரு தொடர் செயல்பாட்டை, ஒரு பழக்கவழக்கத்தை நம்மால் கற்றுக்கொள்ள முடியும் என்பதே ஆகும்.

எழுத்தாளர் சரவண கார்த்திக்கேயன் Saravanakarthikeyan Chinnadurai அவர்கள் ஒரு மென்பொருள் பெருநிறுவனத்தில் வேலை செய்பவர். பணி அழுத்தங்கள், குடும்பக் கடமைகள் எல்லாவற்றிற்கு மத்தியிலும் அவர் ஆற்றுகின்ற தொடர் செயல்பாடுகள் (ஒரு கோடி காலடிகள், பிரியங்கா மோகன் பதிவுகள் உட்பட) என்னை வியக்க வைக்கின்றன. முகநூலில் அன்றாடம் நான்கைந்து பதிவுகளையாவது எழுதிவிடுகிறார். இத்தனை ஆண்டுகளில் ஒருமுறை கூட தனது பணியின் அழுத்தங்கள் தனது பழக்கவழக்கங்களையோ, எழுத்துச் செயல்பாடுகளையோ பாதிப்பதாக புலம்பியதே இல்லை. எல்லாவற்றையும் கட்டுப்பாட்டுக்குள் கையாள்வது நிச்சயம் எளிதல்ல. ஆயினும் முயன்றால் முடியாததும் அல்ல.

அவரது தாக்கத்தில் இன்று வெற்றிகரமாக எனது முதல் நாள் 10,000 காலடிகள் நடைபயிற்சியைத் தொடங்கியிருக்கிறேன். அதுவும் பென்குயின் பதிப்பகம் 2018 ஆம் ஆண்டில் வெளியிட்ட James Clear அவர்கள் எழுதிய Atomic Habits என்ற ஒலிப்புத்தகத்தை Spotify செயலியில் கேட்டுக்கொண்டே! நல்லது நடக்கிறதா பார்ப்போம்!

 #OKK (ஒரு கோடி காலடிகள்) #Day01

இன்று ஆன்மாக்கள் தினம்!

 இன்று ஆன்மாக்கள் தினம்!

கத்தோலிக்க கிறிஸ்தவர்களுக்கு நவம்பர் 2 ஆம் நாள் மிக முக்கியமான நாள்.

அனைத்து ஆன்மாக்களின் தினமாக அனுசரிக்கப்படும் இன்று, இறந்து போனவர்கள் இறைவனின் அமைதியில் இளைப்பாற வேண்டி வழிபாடுகள், செபங்கள் நடத்தப்படுகின்றன. கல்லறைத் தோட்டங்களில் வளர்ந்திருக்கும் புல், பூண்டுகளை அகற்றி, பூக்கள், ஊதுவத்திகள், மெழுகுவர்த்திகள் ஏற்றி, தங்கள் பிரியமானவர்களை நினைத்து, நினைவோடைகளில் நீந்தி, கண்கள் பனிக்க கடவுளை நோக்கி செபிக்கும் ஒரு உணர்வுப்பூர்வமான நாள்.

'நெருநல் உளனொருவன் இன்றில்லை என்னும்

பெருமை உடைத்துஇவ் வுலகு '

என்னும் திருக்குறளுக்கு கலைஞர் 'இந்த உலகமானது நேற்று உயிருடன் இருந்தவரை இன்று இல்லாமல் செய்துவிட்டோம் என்னும் அகந்தையை பெருமையாகக் கொண்டதாகும் என்று விளக்கம் தருகிறார்'.

சுடர்விடும் மெழுகாக ஒளிர்ந்து, காலத்தில் கரைந்து போன அனைத்து முன்னோர்களுக்கும் நன்றியும், வணக்கமும்! வாழ்வு நிறையாது வழிப்பயணத்தில் எடுத்துக்கொள்ளப்பட்டவர்களும் அமைதியில் உறங்கட்டும்! இழப்பின் வெற்றிடத்தில் இங்கே தனித்து விடப்பட்டவர்கள் ஆறுதல் பெற இறைவனை வேண்டுகிறேன்.

Schindler's List : சக மனிதனின் மீதான அன்பும், அக்கறையும்

 

ஹிட்*லர் ஆட்சியின் பெருமைகளை வியந்தோதும் நண்பர்களைப் பார்த்திருக்கிறேன். சீமான் போன்ற கட்சித்தலைவர்கள் அவரை மேற்கோள் காட்டிப் பேசுவதைக் கேட்டிருக்கிறேன். கோவல்கர், ஹெட்கேவர் போன்ற தலைவர்களும் ஹிட்*லரை முன்மாதிரியாகக் கொண்டு இந்தியாவில் சீர்திருத்தங்களைக் கொண்டுவர வேண்டும் என்று கூறியதாக வாசித்திருக்கிறேன்.

மிக நீண்ட காலமாக பார்க்க வேண்டும் என்று அவ்வப்போது நினைத்து இயலாமல் போன Schindler's List என்ற திரைப்படத்தை நேற்று இரவு பார்த்தேன். இரண்டாம் உலகப்போரில் யூத மக்கள் ஜெர்மனியில் SS என்னும் நா.ஜி படையினரால் கூட்டம் கூட்டமாகக் கொன்றழிக்கப்பட்ட நிகழ்வினையும், Schindler என்னும் ஜெர்மானிய தொழில் அதிபர் தன்னுடைய செல்வாக்கால், அஞ்சாத உள்ளத்தால் ஆயிரத்திற்கும் மேற்பட்ட யூதர்களைக் கொலைக்களத்திலிருந்து காப்பாற்றிய வரலாற்று நிகழ்வினைக் காட்சிப்படுத்தியது திரைப்படம்.

ஒரு தீய கருத்தியல் எந்த அளவிற்கு மனித சமூகத்திற்கு தீங்கினை விளைவிக்கும் என்பதை நெஞ்சைப் பதறவைத்து பாடம் நடத்திய திரைப்படம். சாதிப்பற்று, மதப்பற்று, இனப்பற்று, மொழிப்பற்று, தேசப்பற்று எல்லாவற்றிற்கும் மேலானதாக ஒருவர் தேர்வு செய்ய வேண்டியது சக மனிதனின் மீதான அன்பும் அக்கறையும், மரியாதையும் என்று உணர்த்தும் ஒரு நேர்த்தியான திரைப்படம்.

முதல் காட்சியில் யூதர்களின் தொழுகைக்கான மெழுகுவர்த்திகள் மெல்ல மெல்லக் கரைந்து, அணைந்து புகையாக எழும்புவதையும், அதைத் தொடர்ந்து யூத வதை முகாம்களுக்கு செல்லும் மரணப்பாதையின் இரயில் வண்டி புகை எழுப்புவதையும் காட்டுவதிலேயே படத்தின் முழு சாரம்சத்தையும் உணர்த்திவிடுகிறார்கள்.

ஜுராசிக் பார்க் திரைப்படத்தை இயக்கிய ஸ்டீவன் ஸ்பீல்பெர்க் தான் இப்படத்தின் இயக்குநர். ஜுராசிக் பார்க் படத்தில் வரும் பெரிய பெரிய டைனோசர்களும், பயங்கரமான இடியோசை போன்ற அதன் பின்னணி இசையும் துளியும் பயமுறுத்தவில்லை. ஆனால் Schindler's List தொடங்கிய நொடியிலிருந்து மனதில் திக்திக் என்று ஒரு அச்சமும், பதற்றமும், பயமும் தொற்றிக்கொண்டன. பின்னணி இசை பாறையைப் பிளக்கும் வேர்களைப்போல மெல்ல மெல்ல நமக்குள் ஏதோவொன்றைக் கோருகின்றது. நீதியையா? இரக்கத்தையா?

கண்ணாடியில் தெரியும் பிம்பத்தைத் தன் எதிரியாகக் கருதி நகத்தால் பிராண்டும் பூனையைப் போல சக மனிதனை வெறுக்கும் ஒருவர் தன்னையே வெறுக்கிறார்.